KHalish hai KHwab hai aadhi kahani hai

ḳhalish hai ḳhvāb hai aadhī kahānī hai

hamārī baat to bas aanī jaanī hai

samundar se tumheñ vahshat hai kyoñ itnī

ise chhū kar to dekho sirf paanī hai

maiñ kuchh bhī pūchh luuñ kyā farq paḌtā hai

tumheñ to baat hī koī banānī hai

zarā batlāo tum kis kis se milte ho

tumhāre shahr meñ kitnī girānī hai

tumheñ duniyā se matlab hai mujhe tum se

to phir ye kis tarah kī ham-zabānī hai

ham is pahlū se bhī to soch sakte haiñ

sitāra raat kī pahlī nishānī hai

zamīñ ko aate jaate mausamoñ se kyā

use to aag miTTī se bujhānī hai

sabhī haiñ surḳh-rū apnī adālat meñ

kisī ne kab kisī kī baat maanī hai

KHalish hai KHwab hai aadhi kahani hai

hamari baat to bas aani jaani hai

samundar se tumhein wahshat hai kyon itni

ise chhu kar to dekho sirf pani hai

main kuchh bhi puchh lun kya farq paDta hai

tumhein to baat hi koi banani hai

zara batlao tum kis kis se milte ho

tumhaare shahr mein kitni girani hai

tumhein duniya se matlab hai mujhe tum se

to phir ye kis tarah ki ham-zabani hai

hum is pahlu se bhi to soch sakte hain

sitara raat ki pahli nishani hai

zamin ko aate jate mausamon se kya

use to aag miTTi se bujhani hai

sabhi hain surKH-ru apni adalat mein

kisi ne kab kisi ki baat mani hai