KHalish ka husn nazar mein rahe to achchha hai

ḳhalish kā husn nazar meñ rahe to achchhā hai

abhī ye tiir jigar meñ rahe to achchhā hai

mirā ḳhayāl-e-pareshāñ bhī ai shab-e-hijrāñ

jo bazm-e-najm-o-qamar meñ rahe to achchhā hai

gire nazar se to ashkoñ kī aabrū jaa.e

sadā ye aab guhar meñ rahe to achchhā hai

hamesha ishq kī ātish ko siine meñ rakkheñ

jigar kā ḳhuun jigar meñ rahe to achchhā hai

taḌap na dil ki raqīb aa.eñ chārāgar ban kar

ye ghar kī baat hai ghar meñ rahe to achchhā hai

ajab nahīñ vo kisī roz ham-navā ho jaa.eñ

mirā ḳhayāl ḳhabar meñ rahe to achchhā hai

usī ko jehd-e-musalsal kī aabrū kahiye

yaqīñ kā saath safar meñ rahe to achchhā hai

ġhazal to ḳhuub sajā.ī hai aap ne lekin

hunar ye dast-e-hunar meñ rahe to achchhā hai

'nazīr' jhiil kā paanī bhī suukh saktā hai

kañval ye dīda-e-tar meñ rahe to achchhā hai

KHalish ka husn nazar mein rahe to achchha hai

abhi ye tir jigar mein rahe to achchha hai

mera KHayal-e-pareshan bhi ai shab-e-hijran

jo bazm-e-najm-o-qamar mein rahe to achchha hai

gire nazar se to ashkon ki aabru jae

sada ye aab guhar mein rahe to achchha hai

hamesha ishq ki aatish ko sine mein rakkhen

jigar ka KHun jigar mein rahe to achchha hai

taDap na dil ki raqib aaen chaaragar ban kar

ye ghar ki baat hai ghar mein rahe to achchha hai

ajab nahin wo kisi roz ham-nawa ho jaen

mera KHayal KHabar mein rahe to achchha hai

usi ko jehd-e-musalsal ki aabru kahiye

yaqin ka sath safar mein rahe to achchha hai

ghazal to KHub sajai hai aap ne lekin

hunar ye dast-e-hunar mein rahe to achchha hai

'nazir' jhil ka pani bhi sukh sakta hai

kanwal ye dida-e-tar mein rahe to achchha hai