KHamosh kyon hain nazaron ko dekhne wale

ḳhamosh kyoñ haiñ nazāroñ ko dekhne vaale

bahak na jaa.eñ ishāroñ ko dekhne vaale

nigāh dil kī taraf bhī kabhī uThā.ī hai

ba-yak nigāh hazāroñ ko dekhne vaale

nigāh koī ḳhizāñ ke liye bhī hai ki nahīñ

chaman meñ sirf bahāroñ ko dekhne vaale

baḌhā.e jaao qadam apnā jānib-e-manzil

bahut haiñ rāh-guzāroñ ko dekhne vaale

zamīñ pe rah ke zamīñ kā koī ḳhayāl nahīñ

falak pe chāñd sitāroñ ko dekhne vaale

ye kyoñ jhijhak se rahe haiñ ye kyoñ ThiThak se ga.e

guloñ ke saa.e meñ ḳhāroñ ko dekhne vaale

safīna shorish-e-tūfāñ kī nazr ho jaatā

na Dūbte jo kināroñ ko dekhne vaale

yahī hai vaqt ki ruḳh moḌ deñ havāoñ kā

kahāñ haiñ vaqt ke dhāroñ ko dekhne vaale

haiñ chand log abhī mai-kade meñ ai saaqī

tirī nazar ke ishāroñ ko dekhne vaale

jo merī aañkh se gir kar hai zīnat-e-dāman

use bhī dekh sitāroñ ko dekhne vaale

jo baḌh ga.e vahī manzil-nasīb the 'maikash'

paḌe hue haiñ sahāroñ ko dekhne vaale

KHamosh kyon hain nazaron ko dekhne wale

bahak na jaen ishaaron ko dekhne wale

nigah dil ki taraf bhi kabhi uThai hai

ba-yak nigah hazaron ko dekhne wale

nigah koi KHizan ke liye bhi hai ki nahin

chaman mein sirf bahaaron ko dekhne wale

baDhae jao qadam apna jaanib-e-manzil

bahut hain rah-guzaron ko dekhne wale

zamin pe rah ke zamin ka koi KHayal nahin

falak pe chand sitaron ko dekhne wale

ye kyon jhijhak se rahe hain ye kyon ThiThak se gae

gulon ke sae mein KHaron ko dekhne wale

safina shorish-e-tufan ki nazr ho jata

na Dubte jo kinaron ko dekhne wale

yahi hai waqt ki ruKH moD den hawaon ka

kahan hain waqt ke dhaaron ko dekhne wale

hain chand log abhi mai-kade mein ai saqi

teri nazar ke ishaaron ko dekhne wale

jo meri aankh se gir kar hai zinat-e-daman

use bhi dekh sitaron ko dekhne wale

jo baDh gae wahi manzil-nasib the 'maikash'

paDe hue hain sahaaron ko dekhne wale