KHanjar-ba-dast hai na jahan sar-ba-kaf koi

ḳhanjar-ba-dast hai na jahāñ sar-ba-kaf koī

āsār-e-zindagī ke nahīñ us taraf koī

aapas kī kashmakash meñ idhar mubtalā ho tum

maidān-e-zindagī meñ udhar saf-ba-saf koī

ahl-e-havas ne yaad kiyā hai use bahut

jab sāhib-e-zamīr huā hai talaf koī

'izzat har ek siip kī qismat meñ hai kahāñ

hotā hai sarfarāz dahān-e-sadaf koī

dil meñ nahīñ hai jis kā koī pās-o-ehtirām

le kar usī kā naam uThā.e halaf koī

Thukrā ke motiyoñ ko javāhir ko chhoḌ kar

dāman meñ bhar ke le gayā ḳhisht-o-ḳhazaf koī

parvāz apnī apnī nazar kī judā judā

shā.ista-e-salaf koī nang-e-salaf koī

ham vārisān-e-lauh-o-qalam ko bhī ho 'atā

yā-rab jihād-e-harf-o-qalam kā sharaf koī

qātil hai terā tarz-e-taḳhātub bhī ai 'azīz'

rū-e-suḳhan kisī kī taraf hai hadaf koī

KHanjar-ba-dast hai na jahan sar-ba-kaf koi

aasar-e-zindagi ke nahin us taraf koi

aapas ki kashmakash mein idhar mubtala ho tum

maidan-e-zindagi mein udhar saf-ba-saf koi

ahl-e-hawas ne yaad kiya hai use bahut

jab sahib-e-zamir hua hai talaf koi

'izzat har ek sip ki qismat mein hai kahan

hota hai sarfaraaz dahan-e-sadaf koi

dil mein nahin hai jis ka koi pas-o-ehtiram

le kar usi ka nam uThae halaf koi

Thukra ke motiyon ko jawahir ko chhoD kar

daman mein bhar ke le gaya KHisht-o-KHazaf koi

parwaz apni apni nazar ki juda juda

shaista-e-salaf koi nang-e-salaf koi

hum warisan-e-lauh-o-qalam ko bhi ho 'ata

ya-rab jihad-e-harf-o-qalam ka sharaf koi

qatil hai tera tarz-e-taKHatub bhi ai 'aziz'

ru-e-suKHan kisi ki taraf hai hadaf koi