KHanjar ki tarah utre hai jo baat karo ho

ḳhanjar kī tarah utre hai jo baat karo ho

apnoñ pe ye tum kaisī ināyāt karo ho

jab barmalā kahne kī yahāñ rasm nahīñ hai

phir kis liye tum purshish-e-hālāt karo ho

yā kahte the tum khul ke kaho jo bhī hai dil meñ

yā kahte ho tum ham se shikāyāt karo ho

yā ham se ghaḌī-bhar kī judā.ī thī qayāmat

yā ham se ghaḌī-bhar bhī na ab baat karo ho

dekho kabhī us ko bhī jo hai chehroñ ke pīchhe

kahne ko to tum sab se mulāqāt karo ho

ham dil-zadagāñ ko bhī to aa kar kabhī pūchho

tum sab pe karam sab pe ināyāt karo ho

is kūcha se guzro ho na tum us se milo ho

is shahr meñ kaise guzar auqāt karo ho

tasbīh thī us naam kī har-vaqt yā ab tum

allāh kī din-rāt munājāt karo ho

hai tark-e-ta.alluq bhī to yak-gūna ta.alluq

kyuuñ us kī zamāna se shikāyāt karo ho

vo tum se ḳhafā hai to use jā ke manā lo

kyuuñ aur ḳharāb apne ye hālāt karo ho

'iqbāl' uTho kaam meñ ab jī ko lagāo

kis dhyān meñ barbād ye din-rāt karo ho

KHanjar ki tarah utre hai jo baat karo ho

apnon pe ye tum kaisi inayat karo ho

jab barmala kahne ki yahan rasm nahin hai

phir kis liye tum purshish-e-haalat karo ho

ya kahte the tum khul ke kaho jo bhi hai dil mein

ya kahte ho tum hum se shikayat karo ho

ya hum se ghaDi-bhar ki judai thi qayamat

ya hum se ghaDi-bhar bhi na ab baat karo ho

dekho kabhi us ko bhi jo hai chehron ke pichhe

kahne ko to tum sab se mulaqat karo ho

hum dil-zadagan ko bhi to aa kar kabhi puchho

tum sab pe karam sab pe inayat karo ho

is kucha se guzro ho na tum us se milo ho

is shahr mein kaise guzar auqat karo ho

tasbih thi us nam ki har-waqt ya ab tum

allah ki din-raat munajat karo ho

hai tark-e-talluq bhi to yak-guna talluq

kyun us ki zamana se shikayat karo ho

wo tum se KHafa hai to use ja ke mana lo

kyun aur KHarab apne ye haalat karo ho

'iqbaal' uTho kaam mein ab ji ko lagao

kis dhyan mein barbaad ye din-raat karo ho