KHarab-haal wafa ko rulae jate hain

ḳharāb-hāl vafā ko rulā.e jaate haiñ

nazar churā.e hue muskurā.e jaate haiñ

vafā-shi'ār sahī ġhair mujh se kyoñ kahiye

ye roz kis liye qisse sunā.e jaate haiñ

vafā kī qadr tirī anjuman meñ kyoñ hotī

fareb-e-ġhair ke naqshe jamā.e jaate haiñ

tum apne husn pe nāzāñ ho aur ahl-e-nazar

dil-e-ḳharāb kī qīmat baḌhā.e jaate haiñ

kise ḳhabar hai ki anjām-e-ārzū kyā ho

nasīb-e-ishq-o-vafā āzmā.e jaate haiñ

kabhī to 'ishq-o-havas meñ bhī chāhiye ye tamīz

isī umiid pe sadme uThā.e jaate haiñ

ḳhirām-e-nāz kī hashr-āfrīniyāñ tauba

qadam qadam pe qayāmat uThā.e jaate haiñ

ab un kī yaad ko kyoñ kar bhulā.iye dil se

ki resha resha meñ vo to samā.e jaate haiñ

sunā hai ab to haiñ 'razmī' bhī bāryāb-e-jamāl

us anjuman meñ hamesha bulā.e jaate haiñ

KHarab-haal wafa ko rulae jate hain

nazar churae hue muskurae jate hain

wafa-shi'ar sahi ghair mujh se kyon kahiye

ye roz kis liye qisse sunae jate hain

wafa ki qadr teri anjuman mein kyon hoti

fareb-e-ghair ke naqshe jamae jate hain

tum apne husn pe nazan ho aur ahl-e-nazar

dil-e-KHarab ki qimat baDhae jate hain

kise KHabar hai ki anjam-e-arzu kya ho

nasib-e-ishq-o-wafa aazmae jate hain

kabhi to 'ishq-o-hawas mein bhi chahiye ye tamiz

isi umid pe sadme uThae jate hain

KHiram-e-naz ki hashr-afriniyan tauba

qadam qadam pe qayamat uThae jate hain

ab un ki yaad ko kyon kar bhulaiye dil se

ki resha resha mein wo to samae jate hain

suna hai ab to hain 'razmi' bhi baryab-e-jamal

us anjuman mein hamesha bulae jate hain