KHasta-dil hain na hamein aur satana logo

ḳhasta-dil haiñ na hameñ aur satānā logo

zikr us kā na zabāñ par kabhī laanā logo

aql tayyār to hai tark-e-ta.alluq ko magar

itnā āsān nahīñ dil ko manānā logo

jā-ba-jā DhūñDhtī phirtī haiñ nigāheñ jis ko

jaane kis shahr meñ hai us kā Thikāna logo

duur tak phail ga.ī baat hamārī us kī

kal likhā jā.egā ik aur fasāna logo

jaane kis lamha vo kis moḌ pe mil jā.egī

maut kā koī pata hai na Thikāna logo

ḳhud ko mushkil se sambhāle haiñ bahut TuuTe haiñ

ham bikhar jā.eñge mat Thes lagānā logo

'umr bhar ke liye bechain ye kar detā hai

merī maano to kabhī dil na lagānā logo

KHasta-dil hain na hamein aur satana logo

zikr us ka na zaban par kabhi lana logo

aql tayyar to hai tark-e-talluq ko magar

itna aasan nahin dil ko manana logo

ja-ba-ja DhunDhti phirti hain nigahen jis ko

jaane kis shahr mein hai us ka Thikana logo

dur tak phail gai baat hamari us ki

kal likha jaega ek aur fasana logo

jaane kis lamha wo kis moD pe mil jaegi

maut ka koi pata hai na Thikana logo

KHud ko mushkil se sambhaale hain bahut TuTe hain

hum bikhar jaenge mat Thes lagana logo

'umr bhar ke liye bechain ye kar deta hai

meri mano to kabhi dil na lagana logo