ḳhat dekhiye dīdār kī sūjhī ye na.ī hai
vaifar kī jagah aañkh lifāfe pe lagī hai
ḳhākistar-e-tan ḳhair ho barbād huī hai
uḌtī ye ḳhabar gard-e-parīda se sanī hai
ham-ḳhvābī-e-jānāñ mirī qismat meñ likhī hai
sote meñ zuleḳhā kī tarah aañkh lagī hai
lau ishq kī vo hai ki patañge ko jalā kar
sar meñ jo lagī sham.a ke talve meñ bujhī hai
miT jā.egā har ādam-e-ḳhākī kā muraqqa.a
tasvīr-e-gilī jo hai bigaḌne ko banī hai
rone ko maiñ huuñ bārish-e-bārāñ ke muqābil
aañsū jo thame dīda-e-pur-nam to hañsī hai
jī jā.ūñ ki mar jā.ūñ maiñ is nāla-kashī se
nathnoñ meñ hai dam nai kī tarah naak meñ jī hai
Tapkeñ havaseñ kyuuñ na pasīne se hamāre
har rauñgTe se ḳhvāhish-e-dil phuuT bahī hai
siine pe dhare haath na mujh soḳhta-jāñ ke
pahlū meñ kaleje kī jagah aag dabī hai
qaazī kā irāda hai ki hai mai kā muchalka
tauba dar-e-mai-ḳhāna pe dene ko Dhahī hai
ab 'shād' ġhazal aur kaho qaid-e-ravī meñ
is ke to sab abyāt meñ ītā-e-jalī hai
KHat dekhiye didar ki sujhi ye nai hai
waifar ki jagah aankh lifafe pe lagi hai
KHakistar-e-tan KHair ho barbaad hui hai
uDti ye KHabar gard-e-parida se sani hai
ham-KHwabi-e-jaanan meri qismat mein likhi hai
sote mein zuleKHa ki tarah aankh lagi hai
lau ishq ki wo hai ki patange ko jala kar
sar mein jo lagi shama ke talwe mein bujhi hai
miT jaega har aadam-e-KHaki ka muraqqa
taswir-e-gili jo hai bigaDne ko bani hai
rone ko main hun barish-e-baran ke muqabil
aansu jo thame dida-e-pur-nam to hansi hai
ji jaun ki mar jaun main is nala-kashi se
nathnon mein hai dam nai ki tarah nak mein ji hai
Tapken hawasen kyun na pasine se hamare
har raungTe se KHwahish-e-dil phuT bahi hai
sine pe dhare hath na mujh soKHta-jaan ke
pahlu mein kaleje ki jagah aag dabi hai
qazi ka irada hai ki hai mai ka muchalka
tauba dar-e-mai-KHana pe dene ko Dhahi hai
ab 'shad' ghazal aur kaho qaid-e-rawi mein
is ke to sab abyat mein ita-e-jali hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.