KHat mein usko kaise likkhen kya pana kya khona hai

ḳhat meñ us ko kaise likkheñ kyā paanā kyā khonā hai

duurī meñ to ho nahīñ saktā jo aapas meñ honā hai

niiñd kā panchhī aa pahuñchā hai vahshī dil kī baat na sun

mil bhī ga.e to āḳhir thak kar gahrī niiñd hī sonā hai

vo aayā to saare mausam badle badle lagte haiñ

yā kāñToñ kī sej bichhī thī yā phūloñ kā bichhaunā hai

abhī to ḳhushk bahut hai mausam bārish ho to socheñge

ham ne apne armānoñ ko kis miTTī meñ bonā hai

ham ko nasīhat karne vaale ḳhud bhī yahī kuchh karte haiñ

tum kyā qisse le baiThe ho ye umroñ kā ronā hai

kāñch kī guḌiyāñ taaq meñ kab tak aap sajā.e rakkheñge

aaj nahīñ to kal TūTegā jis kā naam khilaunā hai

baḌe baḌe da.ave haiñ lekin chhoTe chhoTe qad 'shahzād'

phāñknī hai kuchh ḳhaak un ko kuchh paanī unheñ bilonā hai

KHat mein us ko kaise likkhen kya pana kya khona hai

duri mein to ho nahin sakta jo aapas mein hona hai

nind ka panchhi aa pahuncha hai wahshi dil ki baat na sun

mil bhi gae to aaKHir thak kar gahri nind hi sona hai

wo aaya to sare mausam badle badle lagte hain

ya kanTon ki sej bichhi thi ya phulon ka bichhauna hai

abhi to KHushk bahut hai mausam barish ho to sochenge

hum ne apne armanon ko kis miTTi mein bona hai

hum ko nasihat karne wale KHud bhi yahi kuchh karte hain

tum kya qisse le baiThe ho ye umron ka rona hai

kanch ki guDiyan taq mein kab tak aap sajae rakkhenge

aaj nahin to kal TuTega jis ka nam khilauna hai

baDe baDe dawe hain lekin chhoTe chhoTe qad 'shahzad'

phankni hai kuchh KHak un ko kuchh pani unhen bilona hai