KHat uske apne hath ka aata nahin koi

ḳhat us ke apne haath kā aatā nahīñ koī

kyā hādsa huā hai batātā nahīñ koī

guḌiyāñ javān kyā huiiñ mere paḌos kī

āñchal meñ jugnuoñ ko chhupātā nahīñ koī

jab se batā diyā hai nujūmī ne merā naam

apnī hatheliyoñ ko dikhātā nahīñ koī

kuchh itnī tez dhuup na.e mausamoñ kī hai

biitī huī rutoñ ko bhulātā nahīñ koī

dekhā hai jab se ḳhud ko mujhe dekhte hue

ā.īna sāmne se haTātā nahīñ koī

'az.har' yahāñ hai ab mire ghar kā akelā-pan

sūraj agar na ho to jagātā nahīñ koī

KHat us ke apne hath ka aata nahin koi

kya hadsa hua hai batata nahin koi

guDiyan jawan kya huin mere paDos ki

aanchal mein jugnuon ko chhupata nahin koi

jab se bata diya hai nujumi ne mera nam

apni hatheliyon ko dikhata nahin koi

kuchh itni tez dhup nae mausamon ki hai

biti hui ruton ko bhulata nahin koi

dekha hai jab se KHud ko mujhe dekhte hue

aaina samne se haTata nahin koi

'azhar' yahan hai ab mere ghar ka akela-pan

suraj agar na ho to jagata nahin koi