KHatm ho jang KHarabe pe hukumat ki jae

ḳhatm ho jañg ḳharābe pe hukūmat kī jaa.e

āḳhirī māraka-e-sabr hai ujlat kī jaa.e

ham na zanjīr ke qābil haiñ na jāgīr ke ahl

ham se inkār kiyā jaa.e na bai.at kī jaa.e

mamlikat aur koī ba.ad meñ arzānī ho

pahle merī hī zamīñ mujh ko ināyat kī jaa.e

yā kiyā jaa.e mujhe ḳhush-nazarī se āzād

yā isī dasht meñ paidā koī sūrat kī jaa.e

ham abas dekhte haiñ ġhurfa-e-ḳhālī kī taraf

ye bhī kyā koī tamāshā hai ki hairat kī jaa.e

ghar bhī rahiye to chale aate haiñ milne ko ġhazāl

kaahe ko bādiya-paimā.ī kī zahmat kī jaa.e

apnī tahrīr to jo kuchh hai so ā.īna hai

ramz-e-tahrīr magar kaise hikāyat kī jaa.e

KHatm ho jang KHarabe pe hukumat ki jae

aaKHiri maraka-e-sabr hai ujlat ki jae

hum na zanjir ke qabil hain na jagir ke ahl

hum se inkar kiya jae na baiat ki jae

mamlikat aur koi baad mein arzani ho

pahle meri hi zamin mujh ko inayat ki jae

ya kiya jae mujhe KHush-nazari se aazad

ya isi dasht mein paida koi surat ki jae

hum abas dekhte hain ghurfa-e-KHali ki taraf

ye bhi kya koi tamasha hai ki hairat ki jae

ghar bhi rahiye to chale aate hain milne ko ghazal

kahe ko baadiya-paimai ki zahmat ki jae

apni tahrir to jo kuchh hai so aaina hai

ramz-e-tahrir magar kaise hikayat ki jae