KHayal-e-husn zaruri hai zindagi ke liye

ḳhayāl-e-husn zarūrī hai zindagī ke liye

charāġh le lo añdhere meñ raushnī ke liye

chhupā.e se bhī kahīñ ishq-o-mushk chhupte haiñ

savāl ban ga.ī be-pardagī kisī ke liye

mujhe jo faiz uThānā hai maiñ uThā lūñgā

ġharaz nigāh-e-karam hai vo ab kisī ke liye

vo dil nazar se girā deñ to ġham kī baat nahīñ

ye jaam vaz.a huā hai shikastagī ke liye

bahakne lagtī hai duniyā sharābiyoñ kī tarah

nazar uThānā bhī dushvār hai kisī ke liye

zamāna jab kabhī āmāda-e-fareb huā

kisī ne parda uThāyā hai āgahī ke liye

surūr-e-chashm-e-nigārāñ na pūchhiye 'mānī'

tabī.at aaj bhī mauzūñ hai shā.irī ke liye

KHayal-e-husn zaruri hai zindagi ke liye

charagh le lo andhere mein raushni ke liye

chhupae se bhi kahin ishq-o-mushk chhupte hain

sawal ban gai be-pardagi kisi ke liye

mujhe jo faiz uThana hai main uTha lunga

gharaz nigah-e-karam hai wo ab kisi ke liye

wo dil nazar se gira den to gham ki baat nahin

ye jam waza hua hai shikastagi ke liye

bahakne lagti hai duniya sharabiyon ki tarah

nazar uThana bhi dushwar hai kisi ke liye

zamana jab kabhi aamada-e-fareb hua

kisi ne parda uThaya hai aagahi ke liye

surur-e-chashm-e-nigaran na puchhiye 'mani'

tabiat aaj bhi mauzun hai shairi ke liye