KHayal-e-jaanan utar raha hai dil-e-hazin par

ḳhayāl-e-jānāñ utar rahā hai dil-e-hazīñ par

hai āsmāñ kā nuzūl yā'nī mirī zamīñ par

maiñ laakh rūThūñ use manāne kā Dhab pata hai

bas ek bosa hasīñ laboñ kā mirī jabīñ par

jahāñ pe ham donoñ pichhlī sardī meñ mil chuke haiñ

rakkhe haiñ ab bhī gulāb sūkhe hue vahīñ par

maiñ us kī ḳhātir junūñ kī had se guzar gayā huuñ

ḳhudā kī bandī hai ab bhī qaa.em nahīñ nahīñ par

na jaane kitnī hasīn āñkheñ mirī taraf haiñ

magar ye āñkheñ Tikī haiñ us ek nāznīñ par

hamārī ġhazloñ meñ yuuñ to sab kuchh hī normal hai

bas āñsuoñ ke nishāñ mileñge kahīñ kahīñ par

na shohratoñ kī bulandiyoñ par gumān karnā

palaT ke aanā paḌegā ik din tumheñ zamīñ par

KHayal-e-jaanan utar raha hai dil-e-hazin par

hai aasman ka nuzul ya'ni meri zamin par

main lakh ruThun use manane ka Dhab pata hai

bas ek bosa hasin labon ka meri jabin par

jahan pe hum donon pichhli sardi mein mil chuke hain

rakkhe hain ab bhi gulab sukhe hue wahin par

main us ki KHatir junun ki had se guzar gaya hun

KHuda ki bandi hai ab bhi qaem nahin nahin par

na jaane kitni hasin aankhen meri taraf hain

magar ye aankhen Tiki hain us ek naznin par

hamari ghazlon mein yun to sab kuchh hi normal hai

bas aansuon ke nishan milenge kahin kahin par

na shohraton ki bulandiyon par guman karna

palaT ke aana paDega ek din tumhein zamin par