KHayal-e-ranj-o-rahat se bari malum hoti hai

ḳhayāl-e-ranj-o-rāhat se barī ma.alūm hotī hai

mohabbat māvarā-e-zindagī ma.alūm hotī hai

ajab kaifiyyat-e-ḳhud-āgahī ma.alūm hotī hai

ḳhudī hotī hai paidā be-ḳhudī ma.alūm hotī hai

chaman meñ kitnī hī sayyād-o-gulchīñ sāzisheñ kar leñ

mashiyyat to magar kuchh aur hī ma.alūm hotī hai

mire māhaul kī pastī kā me.aar itnā ūñchā hai

ki har zillat vaqār-e-zindagī ma.alūm hotī hai

baḌī mushkil se is manzil pe pahuñchā huuñ mohabbat kī

fuġhāñ hoñToñ pe aa kar jab hañsī ma.alūm hotī hai

abas hai chārasāzo ab ilāj-e-dil ke rahne do

mujhe to ab ye kashtī Dūbtī ma.alūm hotī hai

ġhamoñ kī dhuup meñ jaltā huuñ go us kī mohabbat meñ

magar phir bhī vo sūrat chāñd sī ma.alūm hotī hai

bharī mahfil meñ tum ne 'zabt' se kyā pher liiñ āñkheñ

zamāne kī nazar badlī huī ma.alūm hotī hai

KHayal-e-ranj-o-rahat se bari malum hoti hai

mohabbat mawara-e-zindagi malum hoti hai

ajab kaifiyyat-e-KHud-agahi malum hoti hai

KHudi hoti hai paida be-KHudi malum hoti hai

chaman mein kitni hi sayyaad-o-gulchin sazishen kar len

mashiyyat to magar kuchh aur hi malum hoti hai

mere mahaul ki pasti ka mear itna uncha hai

ki har zillat waqar-e-zindagi malum hoti hai

baDi mushkil se is manzil pe pahuncha hun mohabbat ki

fughan honTon pe aa kar jab hansi malum hoti hai

abas hai chaarasazo ab ilaj-e-dil ke rahne do

mujhe to ab ye kashti Dubti malum hoti hai

ghamon ki dhup mein jalta hun go us ki mohabbat mein

magar phir bhi wo surat chand si malum hoti hai

bhari mahfil mein tum ne 'zabt' se kya pher lin aankhen

zamane ki nazar badli hui malum hoti hai