KHayal-e-tark-e-tamanna na kar sake tu bhi

ḳhayāl-e-tark-e-tamannā na kar sake tū bhī

udāsiyoñ kā mudāvā na kar sake tū bhī

kabhī vo vaqt bhī aa.e ki koī lamha-e-aish

mire baġhair gavārā na kar sake tū bhī

ḳhudā vo din na dikhā.e tujhe ki merī tarah

mirī vafā pe bharosā na kar sake tū bhī

maiñ apnā uqda-e-dil tujh ko sauñp detā huuñ

baḌā mazā ho agar vā na kar sake tū bhī

tujhe ye ġham ki mirī zindagī kā kyā hogā

mujhe ye zid ki mudāvā na kar sake tū bhī

na kar ḳhayāl-e-talāfī ki merā zaḳhm-e-vafā

vo zaḳhm hai jise achchhā na kar sake tū bhī

KHayal-e-tark-e-tamanna na kar sake tu bhi

udasiyon ka mudawa na kar sake tu bhi

kabhi wo waqt bhi aae ki koi lamha-e-aish

mere baghair gawara na kar sake tu bhi

KHuda wo din na dikhae tujhe ki meri tarah

meri wafa pe bharosa na kar sake tu bhi

main apna uqda-e-dil tujh ko saunp deta hun

baDa maza ho agar wa na kar sake tu bhi

tujhe ye gham ki meri zindagi ka kya hoga

mujhe ye zid ki mudawa na kar sake tu bhi

na kar KHayal-e-talafi ki mera zaKHm-e-wafa

wo zaKHm hai jise achchha na kar sake tu bhi