KHayal-e-yar se daman chhuDa ke aai hun

ḳhayāl-e-yār se dāman chhuḌā ke aa.ī huuñ

maiñ apne kāñdhe pe aañsū bahā ke aa.ī huuñ

bahut sā bojh thā dil par so dasht-e-ulfat meñ

tumhāre pyaar kā qarza chukā ke aa.ī huuñ

charāġh-e-shab thā mujhe dekh kar tumhārā vajūd

tumhārī āñkhoñ ke dīpak bujhā ke aa.ī huuñ

purāne peḌ mire saath saath rote rahe

jo naam mil ke likhe the miTā ke aa.ī huuñ

charāġh hai ki mire dil meñ yaad kā sūraj

jise darīche meñ shab ke sajā ke aa.ī huuñ

hazār kaliyāñ gulāboñ kī mustarad kar ke

maiñ apne joḌe meñ patte lagā ke aa.ī huuñ

mujhe talāsh karo gard-e-āshiqī meñ jahāñ

maiñ apne pyaar kā sahrā chhupā ke aa.ī huuñ

udhar na jaanā kabhī laḌkiyoñ se kahtī huuñ

maiñ rāh-e-ishq meñ tan-man gañvā ke aa.ī huuñ

KHayal-e-yar se daman chhuDa ke aai hun

main apne kandhe pe aansu baha ke aai hun

bahut sa bojh tha dil par so dasht-e-ulfat mein

tumhaare pyar ka qarza chuka ke aai hun

charagh-e-shab tha mujhe dekh kar tumhaara wajud

tumhaari aankhon ke dipak bujha ke aai hun

purane peD mere sath sath rote rahe

jo nam mil ke likhe the miTa ke aai hun

charagh hai ki mere dil mein yaad ka suraj

jise dariche mein shab ke saja ke aai hun

hazar kaliyan gulabon ki mustarad kar ke

main apne joDe mein patte laga ke aai hun

mujhe talash karo gard-e-ashiqi mein jahan

main apne pyar ka sahra chhupa ke aai hun

udhar na jaana kabhi laDkiyon se kahti hun

main rah-e-ishq mein tan-man ganwa ke aai hun