KHayal-o-fikr ka sadqa utarte rahiye

ḳhayāl-o-fikr kā sadqa utārte rahiye

lahū pilā ke ġhazal ko sañvārte rahiye

ġhurūr-e-fat.h meñ dushman zarūr Dūbegā

hai jītnā to abhī jang hārte rahiye

nigāh-o-dil se ye kahtī hai aa.ine kī kashish

kahīñ na dekhiye ham ko nihārte rahiye

ġham-o-alam kī tarah dukh bhare dinoñ jaisā

kisī bahāne hameñ bhī guzārte rahiye

purānī choT kī yādoñ ko le ke āñkhoñ meñ

jabīñ pe aur lakīreñ ubhārte rahiye

akele-pan se lage Dar to lāzmī hai 'fahīm'

añdherī raat meñ ḳhud ko pukārte rahiye

KHayal-o-fikr ka sadqa utarte rahiye

lahu pila ke ghazal ko sanwarte rahiye

ghurur-e-fath mein dushman zarur Dubega

hai jitna to abhi jang haarte rahiye

nigah-o-dil se ye kahti hai aaine ki kashish

kahin na dekhiye hum ko nihaarte rahiye

gham-o-alam ki tarah dukh bhare dinon jaisa

kisi bahane hamein bhi guzarte rahiye

purani choT ki yaadon ko le ke aankhon mein

jabin pe aur lakiren ubhaarte rahiye

akele-pan se lage Dar to lazmi hai 'fahim'

andheri raat mein KHud ko pukarte rahiye