KHayal-o-KHwab ke paikar badalte rahte hain

ḳhayāl-o-ḳhvāb ke paikar badalte rahte haiñ

ham apnī aag meñ har-dam pighalte rahte haiñ

hameñ hai naaz ki ham haiñ pahāḌ kī mānind

hamārī āñkhoñ se chashme ubalte rahte haiñ

tumhāre vāste ye chiiz hai na.ī varna

yahāñ pe saañp to aksar nikalte rahte haiñ

bulandiyoñ meñ jo uḌte haiñ un ko kyā ma.alūm

ghane banoñ kī haiñ ham aag jalte rahte haiñ

tum apne jism ke malbūs ko bachā.e rakho

ġhalīz paanī haiñ ham to uchhalte rahte haiñ

hamāre saath kahāñ tak chaloge zid na karo

ki rāstoñ kī tarah ham to chalte rahte haiñ

badaltī rut kī tarah un ke pyaar meñ ham bhī

ḳhud apnī shakl ko har-dam badalte rahte haiñ

KHayal-o-KHwab ke paikar badalte rahte hain

hum apni aag mein har-dam pighalte rahte hain

hamein hai naz ki hum hain pahaD ki manind

hamari aankhon se chashme ubalte rahte hain

tumhaare waste ye chiz hai nai warna

yahan pe sanp to aksar nikalte rahte hain

bulandiyon mein jo uDte hain un ko kya malum

ghane banon ki hain hum aag jalte rahte hain

tum apne jism ke malbus ko bachae rakho

ghaliz pani hain hum to uchhalte rahte hain

hamare sath kahan tak chaloge zid na karo

ki raston ki tarah hum to chalte rahte hain

badalti rut ki tarah un ke pyar mein hum bhi

KHud apni shakl ko har-dam badalte rahte hain