KHayal-o-KHwab ki duniya badal gaya koi

ḳhayāl-o-ḳhvāb kī duniyā badal gayā koī

hisār-e-zāt se bāhar nikal gayā koī

hadīs-e-dil kā bhī unvāñ badal gayā koī

hamāre sāġhar-e-hastī meñ Dhal gayā koī

bujhā na paa.ī use āñsuoñ kī bārish bhī

hasad kī aag meñ kuchh itnā jal gayā koī

ḳhizāñ-badosh bahāreñ bhī muskurāne lagīñ

kisī kī yaad meñ aise machal gayā koī

adā-e-ḳhās se kahne lagā vo jām-ba-kaf

ki girte girte yahāñ phir sañbhal gayā koī

batā rahī haiñ ye 'qaisar' dhueñ kī tahrīreñ

parā.ī aag meñ kyoñ phir se jal gayā koī

KHayal-o-KHwab ki duniya badal gaya koi

hisar-e-zat se bahar nikal gaya koi

hadis-e-dil ka bhi unwan badal gaya koi

hamare saghar-e-hasti mein Dhal gaya koi

bujha na pai use aansuon ki barish bhi

hasad ki aag mein kuchh itna jal gaya koi

KHizan-badosh bahaaren bhi muskurane lagin

kisi ki yaad mein aise machal gaya koi

ada-e-KHas se kahne laga wo jam-ba-kaf

ki girte girte yahan phir sanbhal gaya koi

bata rahi hain ye 'qaisar' dhuen ki tahriren

parai aag mein kyon phir se jal gaya koi