KHayali manzaron mein rang bharta ja raha hun

ḳhayālī manzaroñ meñ rang bhartā jā rahā huuñ

maiñ nā-maujūd ko maujūd kartā jā rahā huuñ

zamīñ kī intihā.ī pastiyoñ meñ āsmāñ hai

bulandī kī taraf ziina utartā jā rahā huuñ

mujhe yakjā kiyā jaatā to hai lamha-ba-lamha

magar sā’at-ba-sā’at maiñ bikhartā jā rahā huuñ

mohabbat ke irāde haiñ bahut mazbūt lekin

mohabbat ke taqāzoñ se mukartā jā rahā huuñ

banā rakkhā thā nāma-bar magar kuchh soch kar ab

kabūtar ke tavānā par katartā jā rahā huuñ

mirī poreñ havā kī nabz par rakkhī huī haiñ

maiñ nā-mahsūs ko mahsūs kartā jā rahā huuñ

tirī rahmat to hai bar-haq tirī mahfil meñ phir kyoñ

laraztā aa rahā huuñ aur Dartā jā rahā huuñ

KHayali manzaron mein rang bharta ja raha hun

main na-maujud ko maujud karta ja raha hun

zamin ki intihai pastiyon mein aasman hai

bulandi ki taraf zina utarta ja raha hun

mujhe yakja kiya jata to hai lamha-ba-lamha

magar sa’at-ba-sa’at main bikharta ja raha hun

mohabbat ke irade hain bahut mazbut lekin

mohabbat ke taqazon se mukarta ja raha hun

bana rakkha tha nama-bar magar kuchh soch kar ab

kabutar ke tawana par katarta ja raha hun

meri poren hawa ki nabz par rakkhi hui hain

main na-mahsus ko mahsus karta ja raha hun

teri rahmat to hai bar-haq teri mahfil mein phir kyon

larazta aa raha hun aur Darta ja raha hun