KHayalon ki bulandi zat ki khai se behtar hai

ḳhayāloñ kī bulandī zaat kī khaa.ī se behtar hai

samundar terā sāhil terī gahrā.ī se behtar hai

ye mailā pairahan kirdār kī kaa.ī se behtar hai

bhalā.ī ke liye ik jhuuT sachchā.ī se behtar hai

mire munsif sazā de yā mujhe insāf jaldī de

tirā har faisla barsoñ meñ sunvā.ī se behtar hai

agar manzil na mil paa.e to raste meñ Thahar jaao

safar mauqūf karnā ābla-pā.ī se behtar hai

mire har dard ko mahsūs karnā bāñTanā har ġham

haqīqat ye hai vo mere sage bhaa.ī se behtar hai

sukūñ miltā hai duniyā bhar ke jhagḌoñ se yahāñ aa kar

ye daftar kī imārat ghar kī añgnā.ī se behtar hai

saḌak par yūñhī āvāra bhaTaknā achchhā lagtā hai

yahāñ jo shor hai andar kī tanhā.ī se behtar hai

mirī umr-e-ravāñ ke saath ye bhī baḌhtā jaatā hai

mirā beTā mirī āñkhoñ kī bīnā.ī se behtar hai

kam-az-kam ġhair ruk kar ḳhairiyat to pūchh lete haiñ

sunā hai ajnabiyyat ab shanāsā.ī se behtar hai

kiyā hai muntaḳhab beTī ne jis ko tum bhī apnā lo

zamāna kah rahā hai ghar kī rusvā.ī se behtar hai

KHayalon ki bulandi zat ki khai se behtar hai

samundar tera sahil teri gahrai se behtar hai

ye maila pairahan kirdar ki kai se behtar hai

bhalai ke liye ek jhuT sachchai se behtar hai

mere munsif saza de ya mujhe insaf jaldi de

tera har faisla barson mein sunwai se behtar hai

agar manzil na mil pae to raste mein Thahar jao

safar mauquf karna aabla-pai se behtar hai

mere har dard ko mahsus karna banTana har gham

haqiqat ye hai wo mere sage bhai se behtar hai

sukun milta hai duniya bhar ke jhagDon se yahan aa kar

ye daftar ki imarat ghar ki angnai se behtar hai

saDak par yunhi aawara bhaTakna achchha lagta hai

yahan jo shor hai andar ki tanhai se behtar hai

meri umr-e-rawan ke sath ye bhi baDhta jata hai

mera beTa meri aankhon ki binai se behtar hai

kam-az-kam ghair ruk kar KHairiyat to puchh lete hain

suna hai ajnabiyyat ab shanasai se behtar hai

kiya hai muntaKHab beTi ne jis ko tum bhi apna lo

zamana kah raha hai ghar ki ruswai se behtar hai