khel sab aankhon ka hai sara hunar aankhon ka hai

khel sab āñkhoñ kā hai saarā hunar āñkhoñ kā hai

phir bhī duniyā meñ ḳhasāra sar-ba-sar āñkhoñ kā hai

ham na dekheñge to ye manzar badal jā.eñge kyā

dekhnā Thahrā to kyā naf-o-zarar āñkhoñ kā hai

sochnā kyā hai abhī kār-e-nazar kā mā-hasal

ham to yuuñ ḳhush haiñ ki āġhāz-e-safar āñkhoñ kā hai

rafta rafta saare chehre darmiyāñ se haT ga.e

ek rishta aaj bhī baaqī magar āñkhoñ kā hai

rāsta kyā kyā charāġhoñ kī tarah takte the log

silsila āñkhoñ meñ tā-hadd-e-nazar āñkhoñ kā hai

thak chuke donoñ tamāsha-gāh-e-ālam dekh kar

aao so jaa.eñ ki in āñkhoñ meñ ghar āñkhoñ kā hai

khel sab aankhon ka hai sara hunar aankhon ka hai

phir bhi duniya mein KHasara sar-ba-sar aankhon ka hai

hum na dekhenge to ye manzar badal jaenge kya

dekhna Thahra to kya naf-o-zarar aankhon ka hai

sochna kya hai abhi kar-e-nazar ka ma-hasal

hum to yun KHush hain ki aaghaz-e-safar aankhon ka hai

rafta rafta sare chehre darmiyan se haT gae

ek rishta aaj bhi baqi magar aankhon ka hai

rasta kya kya charaghon ki tarah takte the log

silsila aankhon mein ta-hadd-e-nazar aankhon ka hai

thak chuke donon tamasha-gah-e-alam dekh kar

aao so jaen ki in aankhon mein ghar aankhon ka hai