khincha hua hai gardish-e-aflak ne mujhe

khīñchā huā hai gardish-e-aflāk ne mujhe

ḳhud se nahīñ utarne diyā chaak ne mujhe

mauj-e-havā meñ tairtā phirtā thā maiñ kahīñ

phir yuuñ huā ki khīñch liyā ḳhaak ne mujhe

maiñ raushnī meñ aa ke pashemāñ bahut huā

uryāñ kiyā hai ishq kī poshāk ne mujhe

ā.īñe kī tarah thā maiñ shaffāf o āb-dār

gadlā diyā hai chashm-e-havas-nāk ne mujhe

ḳhushbū sā maiñ ġhilāf ke andar muqīm thā

aur kho diyā hai sīna-e-sad-chāk ne mujhe

apne sivā jahāñ meñ koī sūjhtā nahīñ

lā pheñkā hai kahāñ mire idrāk ne mujhe

khincha hua hai gardish-e-aflak ne mujhe

KHud se nahin utarne diya chaak ne mujhe

mauj-e-hawa mein tairta phirta tha main kahin

phir yun hua ki khinch liya KHak ne mujhe

main raushni mein aa ke pasheman bahut hua

uryan kiya hai ishq ki poshak ne mujhe

aaine ki tarah tha main shaffaf o aab-dar

gadla diya hai chashm-e-hawas-nak ne mujhe

KHushbu sa main ghilaf ke andar muqim tha

aur kho diya hai sina-e-sad-chaak ne mujhe

apne siwa jahan mein koi sujhta nahin

la phenka hai kahan mere idrak ne mujhe