KHizan ka rup na rang-e-bahaar apna hai

ḳhizāñ kā ruup na rang-e-bahār apnā hai

ye kam nahīñ ki dil-e-dāġh-dār apnā hai

parakh lo jins-e-hunar ko mirī nazar vaalo

abhī ravāñ qalam-e-sehr-kār apnā hai

udhar ḳhirad kā taqāza idhar payām-e-junūñ

maiñ kyā batā.ūñ kise intizār apnā hai

nashāt-o-‘aish ke lamhe to 'ārzī haiñ faqat

rafīq-e-'umr ġham-e-pā.edār apnā hai

miTā hī degī kisī din ye gardish-e-daurāñ

vujūd-e-sūrat-e-naqsh-o-nigār apnā hai

batā diyā hai havāoñ ne zard pattoñ ko

ḳhizāñ meñ kaun dam-e-intishār apnā hai

milā hī kyā hameñ āḳhir rifāqat-e-gul se

lipaT rahā hai jo dāman se ḳhaar apnā hai

kisī ke dāman-e-rangīñ pe mail kyā aa.e

uḌā jo raah se haT kar ġhubār apnā hai

dilāse de jo na ummīd hī shab-e-vā'da

to kaun ai ḳhalish-e-intizār apnā hai

ba-qadr-e-zarf hī miltī hai dast-e-sāqī se

agarche bazm meñ har bāda-ḳhvār apnā hai

panāh de jo kaḌī dhuup kī aziyyat se

bas ik vahī shajar-e-sāya-dār apnā hai

faqīr-e-mai-kada ham bhī to haiñ magar saaqī

na jāneñ kaun sī saf meñ shumār apnā hai

ḳhushā vo sham’-e-lahad jis kī raushnī phailī

jo bujh gayā vo charāġh-e-mazār apnā hai

kisī ko kyā kaheñ 'bahzād' is zamāne meñ

hamīñ ko ḳhud nahīñ jab e'tibār apnā hai

KHizan ka rup na rang-e-bahaar apna hai

ye kam nahin ki dil-e-dagh-dar apna hai

parakh lo jins-e-hunar ko meri nazar walo

abhi rawan qalam-e-sehr-kar apna hai

udhar KHirad ka taqaza idhar payam-e-junun

main kya bataun kise intizar apna hai

nashat-o-‘aish ke lamhe to 'arzi hain faqat

rafiq-e-'umr gham-e-paedar apna hai

miTa hi degi kisi din ye gardish-e-dauran

wujud-e-surat-e-naqsh-o-nigar apna hai

bata diya hai hawaon ne zard patton ko

KHizan mein kaun dam-e-intishaar apna hai

mila hi kya hamein aaKHir rifaqat-e-gul se

lipaT raha hai jo daman se KHar apna hai

kisi ke daman-e-rangin pe mail kya aae

uDa jo rah se haT kar ghubar apna hai

dilase de jo na ummid hi shab-e-wa'da

to kaun ai KHalish-e-intizar apna hai

ba-qadr-e-zarf hi milti hai dast-e-saqi se

agarche bazm mein har baada-KHwar apna hai

panah de jo kaDi dhup ki aziyyat se

bas ek wahi shajar-e-saya-dar apna hai

faqir-e-mai-kada hum bhi to hain magar saqi

na jaanen kaun si saf mein shumar apna hai

KHusha wo sham’-e-lahad jis ki raushni phaili

jo bujh gaya wo charagh-e-mazar apna hai

kisi ko kya kahen 'bahzad' is zamane mein

hamin ko KHud nahin jab e'tibar apna hai