KHizan ke be-kaif manzaron ka ba-rang-e-KHushbu jawab rakhna

ḳhizāñ ke be-kaif manzaroñ kā ba-rañg-e-ḳhushbū javāb rakhnā

kisī kī yaad kā apne dil meñ koī mahaktā gulāb rakhnā

tum apne kirdār aur amal ko banā ke ā.īna-e-talaffuz

hasīn lafzoñ kī sūratoñ meñ shanāḳhtoñ kī kitāb rakhnā

udaas chehra hai shām-e-ġham kā dhuāñ dhuāñ shab utar rahī hai

abhī se koī sahar kā manzar nazar meñ apnī janāb rakhnā

bhulā na de ye zamāna tum ko qadīm qabl-e-masīh kah kar

ki zindagī kī kahāniyoñ meñ koī haqīqat kā baab rakhnā

inād-o-nfrat kā zahr koī basāratoñ meñ kabhī na ghole

hamesha āñkhoñ ke mai-kade meñ mohabbatoñ kī sharāb rakhnā

bachī-khuchī nekiyoñ ko tum bhī uThā ke dariyā meñ Daal denā

kisī bhī sāleh amal kā apne kabhī na koī hisāb rakhnā

sahar kī dhundlī sī raushnī meñ tamām din kī basīrateñ huuñ

shu.ūr bedār karne vaale hamārī āñkhoñ meñ ḳhvāb rakhnā

KHizan ke be-kaif manzaron ka ba-rang-e-KHushbu jawab rakhna

kisi ki yaad ka apne dil mein koi mahakta gulab rakhna

tum apne kirdar aur amal ko bana ke aaina-e-talaffuz

hasin lafzon ki suraton mein shanaKHton ki kitab rakhna

udas chehra hai sham-e-gham ka dhuan dhuan shab utar rahi hai

abhi se koi sahar ka manzar nazar mein apni janab rakhna

bhula na de ye zamana tum ko qadim qabl-e-masih kah kar

ki zindagi ki kahaniyon mein koi haqiqat ka bab rakhna

inad-o-nfrat ka zahr koi basaraton mein kabhi na ghole

hamesha aankhon ke mai-kade mein mohabbaton ki sharab rakhna

bachi-khuchi nekiyon ko tum bhi uTha ke dariya mein Dal dena

kisi bhi saleh amal ka apne kabhi na koi hisab rakhna

sahar ki dhundli si raushni mein tamam din ki basiraten hun

shuur bedar karne wale hamari aankhon mein KHwab rakhna