KHizan ke chand ne puchha ye jhuk ke khiDki mein

ḳhizāñ ke chāñd ne pūchhā ye jhuk ke khiḌkī meñ

kabhī charāġh bhī jaltā hai is havelī meñ

ye aadmī haiñ ki saa.e haiñ ādamiyyat ke

guzar huā hai mirā kis ujaaḌ bastī meñ

jhukī chaTān phisaltī giraft jhūltā jism

maiñ ab girā hī girā tañg-o-tār ghāTī meñ

zamāne bhar se nirālī hai aap kī mantiq

nadī ko paar kiyā kis ne ulTī kashtī meñ

jalā.e kyuuñ agar itne hī qīmtī the ḳhutūt

kuredte ho abas raakh ab añgeThī meñ

ajab nahīñ jo ugeñ yaañ daraḳht paanī ke

ki ashk bo.e haiñ shab bhar kisī ne dhartī meñ

mirī giraft meñ aa kar nikal ga.ī titlī

paroñ ke rañg magar rah ga.e haiñ muTThī meñ

chaloge saath mire āgahī kī sarhad tak

ye rahguzār utartī hai gahre paanī meñ

maiñ apnī be-ḳhabarī se 'shakeb' vāqif huuñ

batāo pech haiñ kitne tumhārī pagḌī meñ

KHizan ke chand ne puchha ye jhuk ke khiDki mein

kabhi charagh bhi jalta hai is haweli mein

ye aadmi hain ki sae hain aadamiyyat ke

guzar hua hai mera kis ujaD basti mein

jhuki chaTan phisalti giraft jhulta jism

main ab gira hi gira tang-o-tar ghaTi mein

zamane bhar se nirali hai aap ki mantiq

nadi ko par kiya kis ne ulTi kashti mein

jalae kyun agar itne hi qimti the KHutut

kuredte ho abas rakh ab angeThi mein

ajab nahin jo ugen yan daraKHt pani ke

ki ashk boe hain shab bhar kisi ne dharti mein

meri giraft mein aa kar nikal gai titli

paron ke rang magar rah gae hain muTThi mein

chaloge sath mere aagahi ki sarhad tak

ye rahguzar utarti hai gahre pani mein

main apni be-KHabari se 'shakeb' waqif hun

batao pech hain kitne tumhaari pagDi mein