ḳhizāñ ke daur meñ bhī ham bahār ban ke chhā.e haiñ
ġhamoñ ke saa.e meñ bhī rah ke ham to muskurā.e haiñ
charāġh amn ke bujhe bujhe hue the har taraf
Dare hue diloñ ko ham ne hausle dilā.e haiñ
hamārā kyā bigāḌeñgī ye nafratoñ kī āñdhiyāñ
qadam rah-e-hayāt meñ kuchh is tarah baḌhā.e haiñ
ġhamoñ se khelte hue ye yaad rakhnā chāhiye
jahāñ meñ kho ke kuchh na kuchh baḌe maqām paa.e haiñ
huī hai ham meñ tum meñ jab se dūriyāñ ai jān-e-man
na tum hī muskurā.e ho na ham hī muskurā.e haiñ
tirī hī bazm meñ nahīñ tire liye tirī qasam
jahāñ bhī ham ga.e salāmatī ke jaam uThā.e haiñ
bulandiyoñ ko chhūne hī ke vāste jahān meñ
na.e-na.e taraqqiyoñ ke rāste banā.e haiñ
KHizan ke daur mein bhi hum bahaar ban ke chhae hain
ghamon ke sae mein bhi rah ke hum to muskurae hain
charagh amn ke bujhe bujhe hue the har taraf
Dare hue dilon ko hum ne hausle dilae hain
hamara kya bigaDengi ye nafraton ki aandhiyan
qadam rah-e-hayat mein kuchh is tarah baDhae hain
ghamon se khelte hue ye yaad rakhna chahiye
jahan mein kho ke kuchh na kuchh baDe maqam pae hain
hui hai hum mein tum mein jab se duriyan ai jaan-e-man
na tum hi muskurae ho na hum hi muskurae hain
teri hi bazm mein nahin tere liye teri qasam
jahan bhi hum gae salamati ke jam uThae hain
bulandiyon ko chhune hi ke waste jahan mein
nae-nae taraqqiyon ke raste banae hain
Source:
Taaruf (Pg. 89)
-
Author:
Sahir Lakhnavi
-
- Publisher: Sahir Lakhnavi
- Year of Publication: 2014
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.