KHizan ke KHauf se kaliyon ko larzan dekh leta hun

ḳhizāñ ke ḳhauf se kaliyoñ ko larzāñ dekh letā huuñ

hujūm-e-rang-o-bū meñ ġham ke tūfāñ dekh letā huuñ

bhulā baiThā huuñ yād-e-talḳh ayyām-e-guzishta kī

magar ab bhī kabhī ḳhvāb-e-pareshāñ dekh letā huuñ

taḌap uThtā huuñ ġham se sīna-chākān-e-gulistāñ ke

guloñ ko dekh kar apnā garebāñ dekh letā huuñ

guloñ kī sīna-chākī bulbuloñ kā dard-e-betābi

maiñ har parde meñ tere jaur-e-pinhāñ dekh letā huuñ

dar-e-mai-ḳhāna vā hotā hai vaa.iz maiñ abhī aayā

zarā pī luuñ to bahs-e-kufr-o-īmāñ dekh letā huuñ

jo ġharqābī muqaddar hai to armāñ hī nikal jaa.e

zarā haT nāḳhudā maiñ zor-e-tūfāñ dekh letā huuñ

mirī ḳhuddāriyāñ jiine nahīñ detīñ mujhe 'qaisar'

magar banda huuñ us kā jis ko insāñ dekh letā huuñ

KHizan ke KHauf se kaliyon ko larzan dekh leta hun

hujum-e-rang-o-bu mein gham ke tufan dekh leta hun

bhula baiTha hun yaad-e-talKH ayyam-e-guzishta ki

magar ab bhi kabhi KHwab-e-pareshan dekh leta hun

taDap uThta hun gham se sina-chaakan-e-gulistan ke

gulon ko dekh kar apna gareban dekh leta hun

gulon ki sina-chaaki bulbulon ka dard-e-betabi

main har parde mein tere jaur-e-pinhan dekh leta hun

dar-e-mai-KHana wa hota hai waiz main abhi aaya

zara pi lun to bahs-e-kufr-o-iman dekh leta hun

jo gharqabi muqaddar hai to arman hi nikal jae

zara haT naKHuda main zor-e-tufan dekh leta hun

meri KHuddariyan jine nahin detin mujhe 'qaisar'

magar banda hun us ka jis ko insan dekh leta hun