KHizan ki rut mein gulab lahja bana ke rakhna kamal ye hai

ḳhizāñ kī rut meñ gulāb lahja banā ke rakhnā kamāl ye hai

havā kī zad pe diyā jalānā jalā ke rakhnā kamāl ye hai

zarā sī laġhzish pe toḌ dete haiñ sab ta.alluq zamāne vaale

so aise vaisoñ se bhī ta.alluq banā ke rakhnā kamāl ye hai

kisī ko denā ye mashvara ki vo dukh bichhaḌne kā bhuul jaa.e

aur aise lamhe meñ apne aañsū chhupā ke rakhnā kamāl ye hai

ḳhayāl apnā mizāj apnā pasand apnī kamāl kyā hai

jo yaar chāhe vo haal apnā banā ke rakhnā kamāl ye hai

kisī kī rah se ḳhudā kī ḳhātir uThā ke kāñTe haTā ke patthar

phir us ke aage nigāh apnī jhukā ke rakhnā kamāl ye hai

vo jis ko dekhe to dukh kā lashkar bhī laḌkhaḌā.e shikast khaa.e

laboñ pe apne vo muskurāhaT sajā ke rakhnā kamāl ye hai

KHizan ki rut mein gulab lahja bana ke rakhna kamal ye hai

hawa ki zad pe diya jalana jala ke rakhna kamal ye hai

zara si laghzish pe toD dete hain sab talluq zamane wale

so aise waison se bhi talluq bana ke rakhna kamal ye hai

kisi ko dena ye mashwara ki wo dukh bichhaDne ka bhul jae

aur aise lamhe mein apne aansu chhupa ke rakhna kamal ye hai

KHayal apna mizaj apna pasand apni kamal kya hai

jo yar chahe wo haal apna bana ke rakhna kamal ye hai

kisi ki rah se KHuda ki KHatir uTha ke kanTe haTa ke patthar

phir us ke aage nigah apni jhuka ke rakhna kamal ye hai

wo jis ko dekhe to dukh ka lashkar bhi laDkhaDae shikast khae

labon pe apne wo muskurahaT saja ke rakhna kamal ye hai