KHizan mein sukh gaya main to ye muqaddar tha

ḳhizāñ meñ suukh gayā maiñ to ye muqaddar thā

vo naunihāl kahāñ hai jo mere andar thā

vo aable jo rah-e-ārzū meñ phuuT ga.e

safar kā lutf unhīñ ābloñ meñ muzmar thā

nuqūsh-e-dard tarāshe ġhamoñ ke rañg bhare

maiñ jaise dast-e-mashiyyat meñ koī patthar thā

tumhārī yaad ke saa.e bhī kuchh simaT se ga.e

ġhamoñ kī dhuup to bāhar thī aks andar thā

mirā vajūd bhī tārīḳh hai zamāne kī

mujhe bhī paḌh ke kabhī dekhte to behtar thā

dayār-e-fikr-o-nazar kuchh dhuāñ dhuāñ sā hai

junūñ kī sham.eñ thiiñ raushan to ḳhuub manzar thā

vahī hai aaj zamīñ par ḳharāb-o-ḳhasta-o-ḳhvār

jo apnī shaan meñ nūrāniyoñ se behtar thā

'shamīm' aaj sar-e-rahguzār-e-zīst milā

jo tah-ba-tah ghane zaḳhmoñ kā ek paikar thā

KHizan mein sukh gaya main to ye muqaddar tha

wo naunihaal kahan hai jo mere andar tha

wo aable jo rah-e-arzu mein phuT gae

safar ka lutf unhin aablon mein muzmar tha

nuqush-e-dard tarashe ghamon ke rang bhare

main jaise dast-e-mashiyyat mein koi patthar tha

tumhaari yaad ke sae bhi kuchh simaT se gae

ghamon ki dhup to bahar thi aks andar tha

mera wajud bhi tariKH hai zamane ki

mujhe bhi paDh ke kabhi dekhte to behtar tha

dayar-e-fikr-o-nazar kuchh dhuan dhuan sa hai

junun ki shamen thin raushan to KHub manzar tha

wahi hai aaj zamin par KHarab-o-KHasta-o-KHwar

jo apni shan mein nuraniyon se behtar tha

'shamim' aaj sar-e-rahguzar-e-zist mila

jo tah-ba-tah ghane zaKHmon ka ek paikar tha