KHizan se joD ke rishta bahaar ka koi

ḳhizāñ se joḌ ke rishta bahār kā koī

ḳhushī nahīñ na sahī ġham to de gayā koī

na shukriya na shikāyat ye rabt hai kaisā

kise nasīb thī fursat ki sochtā koī

na koī dost na dushman to phir ye uljhan kyuuñ

tamām umr isī karb meñ rahā koī

ajiib daur se vābastagī rahī merī

ki mil sakā na mujhe apnā ham-navā koī

haqīqatoñ ke bhī ruḳh se naqāb uTh jaatā

kabhī jo apne garebāñ meñ jhāñktā koī

guzar gayā to harīfoñ ke vaar se bach kar

ḳhud apnī teġh-e-anā se na bach sakā koī

zabāñ se kuchh na kahā vo samajh gayā lekin

mirī nigāh meñ thā harf-e-iltijā koī

KHizan se joD ke rishta bahaar ka koi

KHushi nahin na sahi gham to de gaya koi

na shukriya na shikayat ye rabt hai kaisa

kise nasib thi fursat ki sochta koi

na koi dost na dushman to phir ye uljhan kyun

tamam umr isi karb mein raha koi

ajib daur se wabastagi rahi meri

ki mil saka na mujhe apna ham-nawa koi

haqiqaton ke bhi ruKH se naqab uTh jata

kabhi jo apne gareban mein jhankta koi

guzar gaya to harifon ke war se bach kar

KHud apni tegh-e-ana se na bach saka koi

zaban se kuchh na kaha wo samajh gaya lekin

meri nigah mein tha harf-e-iltija koi