kho kar use sar apna paTakti rahi hai ruh

kho kar use sar apnā paTaktī rahī hai ruuh

janmoñ salīb-e-ġham pe laTaktī rahī hai ruuh

gum-gashta lazzatoñ ke tajassus meñ 'umr-bhar

parchhā.iyoñ kī samt lapaktī rahī hai ruuh

hañste rahe haiñ lab tirī dil-jūī ke liye

roTī rahī hai ruuh sisaktī rahī hai ruuh

ik 'umr mujh se jism kā rishta rahā magar

ik 'umr tujh se duur bhaTaktī rahī hai ruuh

chhoḌā na qātiloñ ne mire jism kā nishāñ

un ke magar diloñ meñ khaTaktī rahī hai ruuh

us kā mizāj thī ki muqaddar thī gum-rahī

janmoñ badan ke ban meñ bhaTaktī rahī hai ruuh

yādoñ ke aa.ine meñ koī chāñd dekh kar

bachche kī tarh us pe humaktī rahī hai ruuh

is draupadī kā chīr-haran kaun kar sakā

ḳhud ko hazār pardoñ meñ Dhaktī rahī hai ruuh

kyā jaane jā basā hai vo kis chitrakōt meñ

jis kī birah meñ roTī bilaktī rahī hai ruuh

yādoñ ke mai-kade se nikal kar bhī der tak

is ruup ke nashe meñ bahaktī rahī hai ruuh

pheñkā thā us ne mujh pe tabassum kā ek phuul

tab se 'shabāb' apnī mahaktī rahī hai ruuh

kho kar use sar apna paTakti rahi hai ruh

janmon salib-e-gham pe laTakti rahi hai ruh

gum-gashta lazzaton ke tajassus mein 'umr-bhar

parchhaiyon ki samt lapakti rahi hai ruh

hanste rahe hain lab teri dil-jui ke liye

roTi rahi hai ruh sisakti rahi hai ruh

ek 'umr mujh se jism ka rishta raha magar

ek 'umr tujh se dur bhaTakti rahi hai ruh

chhoDa na qatilon ne mere jism ka nishan

un ke magar dilon mein khaTakti rahi hai ruh

us ka mizaj thi ki muqaddar thi gum-rahi

janmon badan ke ban mein bhaTakti rahi hai ruh

yaadon ke aaine mein koi chand dekh kar

bachche ki tarh us pe humakti rahi hai ruh

is draupadi ka chir-haran kaun kar saka

KHud ko hazar pardon mein Dhakti rahi hai ruh

kya jaane ja basa hai wo kis chitrakoot mein

jis ki birah mein roTi bilakti rahi hai ruh

yaadon ke mai-kade se nikal kar bhi der tak

is rup ke nashe mein bahakti rahi hai ruh

phenka tha us ne mujh pe tabassum ka ek phul

tab se 'shabab' apni mahakti rahi hai ruh