KHud apni jaan ka aazar ho ke rah gaya hai

ḳhud apnī jaan kā āzār ho ke rah gayā hai

maiñ huuñ vo qila jo mismār ho ke rah gayā hai

nahīñ hai harf-e-shikāyat kisī ke hoñToñ par

har aadmī dar-o-dīvār ho ke rah gayā hai

kahāñ se aa ga.ī āḳhir fazā meñ itnī ghuTan

ki saañs lenā bhī dushvār ho ke rah gayā hai

hamāre haath lagī hai ye kyā masīhā.ī

jise bhī dekhiye bīmār ho ke rah gayā hai

gharoñ pe ab koī tanqīd kī bhī kaise jaa.e

ki ghar to rishtoñ kā bāzār ho ke rah gayā hai

siyāsiyāt meñ sab se baḌā jo naam hai aaj

hamāre biich adākār ho ke rah gayā hai

kahā gayā jise hindostāñ kā dil 'shāhid'

vo shahr shahr-e-gunahgār ho ke rah gayā hai

KHud apni jaan ka aazar ho ke rah gaya hai

main hun wo qila jo mismar ho ke rah gaya hai

nahin hai harf-e-shikayat kisi ke honTon par

har aadmi dar-o-diwar ho ke rah gaya hai

kahan se aa gai aaKHir faza mein itni ghuTan

ki sans lena bhi dushwar ho ke rah gaya hai

hamare hath lagi hai ye kya masihai

jise bhi dekhiye bimar ho ke rah gaya hai

gharon pe ab koi tanqid ki bhi kaise jae

ki ghar to rishton ka bazar ho ke rah gaya hai

siyasiyat mein sab se baDa jo nam hai aaj

hamare bich adakar ho ke rah gaya hai

kaha gaya jise hindostan ka dil 'shahid'

wo shahr shahr-e-gunahgar ho ke rah gaya hai