KHud ban gai hai baat banane mein main na tha

ḳhud ban ga.ī hai baat banāne meñ maiñ na thā

is vāqiye ke koī fasāne meñ maiñ na thā

manzar ko saath le ga.ī sūraj kī raushnī

din ke hasīn rang miTāne meñ maiñ na thā

jaise ufuq pe khīñch de koī lakīr sī

is tarah se parinde uḌāne meñ maiñ na thā

kuchh dostoñ ke haath bhī malbūs is meñ the

tanhā faqat futūr jagāne meñ maiñ na thā

hoñToñ pe sīdhe saade jo aa.e the kah diye

lafzoñ ke talḳh tiir chalāne meñ maiñ na thā

qurbat zarā sī baḌhte hī vo to simaT gayā

varna fuzūl chhupne chhupāne meñ maiñ na thā

suunā sā rasta dhuup shajar duur ik sadā

tasvīr aisī koī dikhāne meñ maiñ na thā

dariyā kī aatī jaatī sī lahreñ takā karūñ

sāhil pe aisī chhāp bichhāne meñ maiñ na thā

'parvez' aur baat ki hushiyār huuñ bahut

jaadū magar kisī pe chalāne meñ maiñ na thā

KHud ban gai hai baat banane mein main na tha

is waqiye ke koi fasane mein main na tha

manzar ko sath le gai suraj ki raushni

din ke hasin rang miTane mein main na tha

jaise ufuq pe khinch de koi lakir si

is tarah se parinde uDane mein main na tha

kuchh doston ke hath bhi malbus is mein the

tanha faqat futur jagane mein main na tha

honTon pe sidhe sade jo aae the kah diye

lafzon ke talKH tir chalane mein main na tha

qurbat zara si baDhte hi wo to simaT gaya

warna fuzul chhupne chhupane mein main na tha

suna sa rasta dhup shajar dur ek sada

taswir aisi koi dikhane mein main na tha

dariya ki aati jati si lahren taka karun

sahil pe aisi chhap bichhane mein main na tha

'parwez' aur baat ki hushiyar hun bahut

jadu magar kisi pe chalane mein main na tha