KHud hi nahin hayat mein aaya hua hai dard

ḳhud hī nahīñ hayāt meñ aaya huā hai dard

kar ke raqam ḳhushī ko kamāyā huā hai dard

ik dil nahīñ hamārā hai us ke nishāne par

rag rag nafas nafas meñ samāyā huā hai dard

ab bhīgtī nahīñ hai alam se hamārī aañkh

ġham kī tamāzatoñ meñ sukhāyā huā hai dard

dikhtī hai Tiis āñkhoñ meñ chīḳheñ ḳhamosh haiñ

kuchh is tarah jigar meñ dabāyā huā hai dard

har aañkh hai bujhī bujhī chehra udaas hai

jaise fazā pe shahr kī chhāyā huā hai dard

ḳhushiyoñ ke saath miltā rahe lutf-e-ġham hameñ

ḳhushiyoñ meñ ham ne thoḌā milāyā huā hai dard

un ko judā.ī ham se bhalā kyoñ gavāra ho

nāz-o-adā se ham ne uThāyā huā hai dard

KHud hi nahin hayat mein aaya hua hai dard

kar ke raqam KHushi ko kamaya hua hai dard

ek dil nahin hamara hai us ke nishane par

rag rag nafas nafas mein samaya hua hai dard

ab bhigti nahin hai alam se hamari aankh

gham ki tamazaton mein sukhaya hua hai dard

dikhti hai Tis aankhon mein chiKHen KHamosh hain

kuchh is tarah jigar mein dabaya hua hai dard

har aankh hai bujhi bujhi chehra udas hai

jaise faza pe shahr ki chhaya hua hai dard

KHushiyon ke sath milta rahe lutf-e-gham hamein

KHushiyon mein hum ne thoDa milaya hua hai dard

un ko judai hum se bhala kyon gawara ho

naz-o-ada se hum ne uThaya hua hai dard