KHud ko fareb-o-makr-o-dagha ke KHilaf rakh

ḳhud ko fareb-o-makr-o-daġhā ke ḳhilāf rakh

dil apnā aa.ine kī tarah pāk-sāf rakh

mujh ko haqīqatoñ kī fazāoñ meñ uḌne de

tū apne paas tazkira-e-koh-e-qāf rakh

iqrār jis kī zaat kā roz-e-azal kiyā

us kī zamīn par na but-e-inhirāf rakh

shamshīr ke baġhair kisī kaam kā nahīñ

nādān apne saath na ḳhālī ġhilāf rakh

māshūq-e-jāvedāñ ko rijhāne ke vāste

kapḌoñ se baḌh ke qalb-o-jigar pāk-sāf rakh

TukḌe dikhā.ī degā tujhe chehra-e-nashāt

tū dil ke aa.ine meñ na koī shigāf rakh

sheva hai terā haq kī himāyat kā ai 'shafī.a'

jo haq nahīñ tū us se sadā iḳhtilāf rakh

KHud ko fareb-o-makr-o-dagha ke KHilaf rakh

dil apna aaine ki tarah pak-saf rakh

mujh ko haqiqaton ki fazaon mein uDne de

tu apne pas tazkira-e-koh-e-qaf rakh

iqrar jis ki zat ka roz-e-azal kiya

us ki zamin par na but-e-inhiraf rakh

shamshir ke baghair kisi kaam ka nahin

nadan apne sath na KHali ghilaf rakh

mashuq-e-jawedan ko rijhane ke waste

kapDon se baDh ke qalb-o-jigar pak-saf rakh

TukDe dikhai dega tujhe chehra-e-nashat

tu dil ke aaine mein na koi shigaf rakh

shewa hai tera haq ki himayat ka ai 'shafia'

jo haq nahin tu us se sada iKHtilaf rakh