KHud ko KHud par hi jo ifsha kabhi karna paD jae

ḳhud ko ḳhud par hī jo ifshā kabhī karnā paḌ jaa.e

jaise jiine kī bahut chaah meñ marnā paḌ jaa.e

aisā ik vaqt jab aatā hai to kyā karte ho

dil jo karnā nahīñ chāhe vahī karnā paḌ jaa.e

ho to mahtāb ke ham-raqs magar aisā na ho

dāman-e-chashm sitāroñ hī se bharnā paḌ jaa.e

jis ko dekhā na kabhī jis kī tamannā bhī na kī

paañv usī shahr ke raste pe jo dharnā paḌ jaa.e

sūrat-e-ashk-e-nadāmat hī sahī ai 'shahpar'

merī āñkhoñ se kabhī us ko guzarnā paḌ jaa.e

KHud ko KHud par hi jo ifsha kabhi karna paD jae

jaise jine ki bahut chah mein marna paD jae

aisa ek waqt jab aata hai to kya karte ho

dil jo karna nahin chahe wahi karna paD jae

ho to mahtab ke ham-raqs magar aisa na ho

daman-e-chashm sitaron hi se bharna paD jae

jis ko dekha na kabhi jis ki tamanna bhi na ki

panw usi shahr ke raste pe jo dharna paD jae

surat-e-ashk-e-nadamat hi sahi ai 'shahpar'

meri aankhon se kabhi us ko guzarna paD jae