KHud ko sameTne mein thi itni agar-magar

ḳhud ko sameTne meñ thī itnī agar-magar

bikhrā paḌā huuñ aaj bhī tere idhar-udhar

apnī kamī se kah do ki shiddat se to rahe

dekho ki rah na jaa.e kahīñ kuchh kasar-vasar

ik roz tum bhī to zarā ḳhud se nikal milo

tai kar liye haiñ maiñ ne to saare safar-vafar

nafrat tirī yā pyaar ho ġham ho sharāb ho

mumkin nahīñ hai thoḌe meñ apnī guzar-basar

tū kyā ga.ī maiñ ho gayā huuñ saḳht-jān maañ

lagtī nahīñ hai ab to mujhe kuchh nazar-vazar

muddat se kuchh bhī to terī chaltī nahīñ ḳhudā

rakkhā tū kar jahān kī bhī kuchh ḳhabar-vabar

bas ishq kā hai maarā to kuchh sher kah diye

varna hai ‘āshnā’ meñ kahāñ kuchh hunar-vunar

KHud ko sameTne mein thi itni agar-magar

bikhra paDa hun aaj bhi tere idhar-udhar

apni kami se kah do ki shiddat se to rahe

dekho ki rah na jae kahin kuchh kasar-wasar

ek roz tum bhi to zara KHud se nikal milo

tai kar liye hain main ne to sare safar-wafar

nafrat teri ya pyar ho gham ho sharab ho

mumkin nahin hai thoDe mein apni guzar-basar

tu kya gai main ho gaya hun saKHt-jaan man

lagti nahin hai ab to mujhe kuchh nazar-wazar

muddat se kuchh bhi to teri chalti nahin KHuda

rakkha tu kar jahan ki bhi kuchh KHabar-wabar

bas ishq ka hai mara to kuchh sher kah diye

warna hai ‘ashna’ mein kahan kuchh hunar-wunar