KHud ko sharminda-e-dua na kare

ḳhud ko sharminda-e-duā na kare

hai bashar vo jo iltijā na kare

kaash vo dil meñ ho mire paivast

un kā tīr-e-nazar ḳhatā na kare

ho ke majbūr hai bashar meñ ye shar

gar mile iḳhtiyār kyā na kare

lutf aa jaa.e dil jo koī kaam

aap kī yaad ke sivā na kare

dil meñ jab tak na ho koī tahrīk

sher shā.ir kabhī kahā na kare

yād-e-haq kyā karoge piirī meñ

kyā ḳhabar umr hī vafā na kare

jo mohabbat meñ jaan de na sake

vo mohabbat kā hausla na kare

hai ḳhudā ḳhush usī se ai 'āqil'

jo kisī kā kabhī burā na kare

KHud ko sharminda-e-dua na kare

hai bashar wo jo iltija na kare

kash wo dil mein ho mere paiwast

un ka tir-e-nazar KHata na kare

ho ke majbur hai bashar mein ye shar

gar mile iKHtiyar kya na kare

lutf aa jae dil jo koi kaam

aap ki yaad ke siwa na kare

dil mein jab tak na ho koi tahrik

sher shair kabhi kaha na kare

yaad-e-haq kya karoge piri mein

kya KHabar umr hi wafa na kare

jo mohabbat mein jaan de na sake

wo mohabbat ka hausla na kare

hai KHuda KHush usi se ai 'aqil'

jo kisi ka kabhi bura na kare