KHud-saKHta saza ko jo hum chun liye gae

ḳhud-sāḳhta sazā ko jo ham chun liye ga.e

hasrat ke jaal chāroñ taraf bun liye ga.e

phir ye batā ki dā'vā-e-sarf-e-nazar thā kyā

sīnoñ ke raaz tak bhī agar sun liye ga.e

niklā na koī hal bhī mohabbat ke jurm kā

ik ek kar ke jitne the sar dhun liye ga.e

tūfāñ meñ ġharq ho gayā jab shahr sab kā sab

tab jā ke sirf hosh ke nāḳhun liye ga.e

gadlī paḌī hai phir bhī koī jhiil zarf kī

zarrāt garche ret ke sab pun liye ga.e

rach-bas gayā thā zehn meñ ehsās hijr kā

lekin ḳhayāl she'r ke ḳhush-kun liye ga.e

jismoñ ke mail dhul ga.e dil ke na dhul sake

jitne bhī besh-qīmtī sābun liye ga.e

KHud-saKHta saza ko jo hum chun liye gae

hasrat ke jal chaaron taraf bun liye gae

phir ye bata ki da'wa-e-sarf-e-nazar tha kya

sinon ke raaz tak bhi agar sun liye gae

nikla na koi hal bhi mohabbat ke jurm ka

ek ek kar ke jitne the sar dhun liye gae

tufan mein gharq ho gaya jab shahr sab ka sab

tab ja ke sirf hosh ke naKHun liye gae

gadli paDi hai phir bhi koi jhil zarf ki

zarraat garche ret ke sab pun liye gae

rach-bas gaya tha zehn mein ehsas hijr ka

lekin KHayal she'r ke KHush-kun liye gae

jismon ke mail dhul gae dil ke na dhul sake

jitne bhi besh-qimti sabun liye gae