KHud se bezar zamane se KHafa lagta hai

ḳhud se bezār zamāne se ḳhafā lagtā hai

vahshat-e-jāñ kā asar dil pe sivā lagtā hai

dasht-e-ummīd kī jhulsī huī ḳhāmoshī meñ

bas tirā naam mujhe harf-e-duā lagtā hai

sabz pattoñ pe chamaktī huī shabnam ne kahā

raat Dhal jaa.e to har rang nayā lagtā hai

ham bharī bazm meñ chup haiñ ki hameñ tere sivā

ab koī aur pukāre to burā lagtā hai

vo to ham the jo tujhe bhiiḌ meñ pahchān ga.e

ye tirā vahm hai tū sab se judā lagtā hai

zard miTTī ke sivā kyā hai badan kā jaadū

kyoñ mirā aks mujhe is ke sivā lagtā hai

zindagī ham tire mamnūn haiñ behad lekin

tū jo ehsān jatā.e to burā lagtā hai

chand sikkoñ ke evaz sar ko jo bech aa.e the

ab pareshāñ haiñ ki har shaḳhs ḳhudā lagtā hai

KHud se bezar zamane se KHafa lagta hai

wahshat-e-jaan ka asar dil pe siwa lagta hai

dasht-e-ummid ki jhulsi hui KHamoshi mein

bas tera nam mujhe harf-e-dua lagta hai

sabz patton pe chamakti hui shabnam ne kaha

raat Dhal jae to har rang naya lagta hai

hum bhari bazm mein chup hain ki hamein tere siwa

ab koi aur pukare to bura lagta hai

wo to hum the jo tujhe bhiD mein pahchan gae

ye tera wahm hai tu sab se juda lagta hai

zard miTTi ke siwa kya hai badan ka jadu

kyon mera aks mujhe is ke siwa lagta hai

zindagi hum tere mamnun hain behad lekin

tu jo ehsan jatae to bura lagta hai

chand sikkon ke ewaz sar ko jo bech aae the

ab pareshan hain ki har shaKHs KHuda lagta hai