KHud se nibah shaq hua hai kabhi kabhi

ḳhud se nibāh shaaq huā hai kabhī kabhī

saarā vajūd chaaq huā hai kabhī kabhī

DhūñDā use to ḳhud se mulāqāt ho ga.ī

aisā bhī ittifāq huā hai kabhī kabhī

har zāviye se aks ko dekhā hai aañkh ne

har baat kā firāq huā hai kabhī kabhī

haa.il hai jo azal se mire hāl-o-qāl meñ

vo bhī ayaañ nifāq huā hai kabhī kabhī

hañste haiñ jab bhī log to lagtā hai yuuñ mujhe

mujh se bhī ye mazāq huā hai kabhī kabhī

ḳhāmoshiyoñ kī tarz se bāvar huā mujhe

dil be-hisī meñ taaq huā hai kabhī kabhī

'rāhat' hai jis kī zaat se rishta qarīb kā

vo bhī aziiz aaq huā hai kabhī kabhī

KHud se nibah shaq hua hai kabhi kabhi

sara wajud chaq hua hai kabhi kabhi

DhunDa use to KHud se mulaqat ho gai

aisa bhi ittifaq hua hai kabhi kabhi

har zawiye se aks ko dekha hai aankh ne

har baat ka firaq hua hai kabhi kabhi

hail hai jo azal se mere haal-o-qal mein

wo bhi ayan nifaq hua hai kabhi kabhi

hanste hain jab bhi log to lagta hai yun mujhe

mujh se bhi ye mazaq hua hai kabhi kabhi

KHamoshiyon ki tarz se bawar hua mujhe

dil be-hisi mein taq hua hai kabhi kabhi

'rahat' hai jis ki zat se rishta qarib ka

wo bhi aziz aaq hua hai kabhi kabhi