KHuda-e-pak abhi itna mehrban to hai

ḳhudā-e-pāk abhī itnā mehrbān to hai

hamāre sar ye kirā.e kā sā.ebān to hai

aTak aTak ke sahī kuchh to bol letā huuñ

ki TūTī-phūTī sī merī bhī ik zabān to hai

bachā ke rakkhā hai aslāf kī amānat ko

hamāre ghar meñ buzurgoñ kā pān-dān to hai

ḳhudā ke bande ḳhudā.ī pe faḳhr paidā kar

tirī zamīñ na sahī terā āsmān to hai

kisī kā jazba-e-ulfat kisī kā josh-e-junūñ

abhī javān huā thā abhī javān to hai

samajh ke is ko huqūq-ul-ibād zinda huuñ

mirī galī meñ paḌosī kā nāb-dān to hai

yahīñ pe baiTh parinde shikār kar 'hamza'

yahāñ pe sher nahīñ sher kā machān to hai

KHuda-e-pak abhi itna mehrban to hai

hamare sar ye kirae ka saeban to hai

aTak aTak ke sahi kuchh to bol leta hun

ki TuTi-phuTi si meri bhi ek zaban to hai

bacha ke rakkha hai aslaf ki amanat ko

hamare ghar mein buzurgon ka pan-dan to hai

KHuda ke bande KHudai pe faKHr paida kar

teri zamin na sahi tera aasman to hai

kisi ka jazba-e-ulfat kisi ka josh-e-junun

abhi jawan hua tha abhi jawan to hai

samajh ke is ko huquq-ul-ibaad zinda hun

meri gali mein paDosi ka nab-dan to hai

yahin pe baiTh parinde shikar kar 'hamza'

yahan pe sher nahin sher ka machan to hai