KHuda jaane zaban par aaj kis kafir ka nam aaya

ḳhudā jaane zabāñ par aaj kis kāfir kā naam aayā

mohabbat jhuum jhuum uTThī mashiyyat kā salām aayā

adab ai ārzū-e-shauq vaqt-e-ehtirām aayā

junūñ kī manzileñ tai ho chukīñ dil kā maqām aayā

tarīq-e-ishq meñ aksar ik aisā bhī maqām aayā

qadam uThne nahīñ paa.e ki manzil kā salām aayā

maze ke saath guzrā huuñ mohabbat kī manāzil se

kabhī apnā maqām aayā kabhī un kā maqām aayā

vo lamha bhī kisī kī anjuman meñ kyā qayāmat thā

nigāhoñ kī zabāñ meñ dil ko jab dil kā payām aayā

yakāyak aur dil kī dhaḌkanoñ kā tez ho jaanā

sañbhal ai ishq phir shāyad koī nāzuk maqām aayā

shaguft-e-dil hī ke dam tak thī rañg-o-bū kī duniyā bhī

na phir koī kalī chaTkī na phir koī payām aayā

badal kar rah ga.iiñ ai 'ārzū' qismat kī tahrīreñ

ye kis ke dast-e-nāzuk se mire hāthoñ meñ jaam aayā

KHuda jaane zaban par aaj kis kafir ka nam aaya

mohabbat jhum jhum uTThi mashiyyat ka salam aaya

adab ai aarzu-e-shauq waqt-e-ehtiram aaya

junun ki manzilen tai ho chukin dil ka maqam aaya

tariq-e-ishq mein aksar ek aisa bhi maqam aaya

qadam uThne nahin pae ki manzil ka salam aaya

maze ke sath guzra hun mohabbat ki manazil se

kabhi apna maqam aaya kabhi un ka maqam aaya

wo lamha bhi kisi ki anjuman mein kya qayamat tha

nigahon ki zaban mein dil ko jab dil ka payam aaya

yakayak aur dil ki dhaDkanon ka tez ho jaana

sanbhal ai ishq phir shayad koi nazuk maqam aaya

shaguft-e-dil hi ke dam tak thi rang-o-bu ki duniya bhi

na phir koi kali chaTki na phir koi payam aaya

badal kar rah gain ai 'arzu' qismat ki tahriren

ye kis ke dast-e-nazuk se mere hathon mein jam aaya