KHuda ke waste chehre se Tuk naqab uTha

ḳhudā ke vāste chehre se Tuk naqāb uThā

ye darmiyān se ab parda-e-hijāb uThā

ye kaun bāda-parastī hai ai but-e-bad-mast

uThā jo bazm se terī so ho kabāb uThā

mutāle.e se tire bait-abrūoñ ke shoḳh

rakkhī hai shaiḳh ne ab taaq par kitāb uThā

basān-e-naqsh-e-qadam jis ne pā-turāb kiyā

vo rāh-e-ishq meñ miT kar ġharaz shitāb uThā

ba-chashm-e-tar hī koī dam tū baiTh varna abas

tū ek dam ke liye bahr se hubāb uThā

piyā hai shīsha-e-gardūñ se jis ne ik jur.a

misāl-e-jām vo bā-dīda-e-pur-āb uThā

'nasīr' shor na kar fitna hovegā barpā

ḳhudā-na-ḳhvāsta ab gar vo mast-e-ḳhvāb uThā

KHuda ke waste chehre se Tuk naqab uTha

ye darmiyan se ab parda-e-hijab uTha

ye kaun baada-parasti hai ai but-e-bad-mast

uTha jo bazm se teri so ho kabab uTha

mutalee se tere bait-abruon ke shoKH

rakkhi hai shaiKH ne ab taq par kitab uTha

basan-e-naqsh-e-qadam jis ne pa-turab kiya

wo rah-e-ishq mein miT kar gharaz shitab uTha

ba-chashm-e-tar hi koi dam tu baiTh warna abas

tu ek dam ke liye bahr se hubab uTha

piya hai shisha-e-gardun se jis ne ek jura

misal-e-jam wo ba-dida-e-pur-ab uTha

'nasir' shor na kar fitna howega barpa

KHuda-na-KHwasta ab gar wo mast-e-KHwab uTha