KHuda ne husn diya hai tumhein shabab ke sath

ḳhudā ne husn diyā hai tumheñ shabāb ke saath

subū-o-jām khanakte hue rabāb ke saath

laboñ se chhū ke pilāo sharāb vā'iz ko

purāne log haiñ piite haiñ ye gulāb ke saath

ye kis kī zulf-e-pareshāñ kā faiz hai yaaro

tamām 'umr guzārī hai pech-o-tāb ke saath

khilī huī jo hai sūraj-mukhī gulistāñ meñ

ye kis ne aañkh milā.ī hai āftāb ke saath

kahāñ vo garmī-e-'azm-o-'amal vo qurbānī

vo josh ḳhatm huā daur-e-inqilāb ke saath

ḳhudī ko faḳhr hai hamdam anā ko ham par naaz

ki ham ne 'umr guzārī hai āb-o-tāb ke saath

rivāyatoñ ko kabhī chhoḌte nahīñ 'gulzār'

shagūfe rahte haiñ har vaqt kuchh janāb ke saath

KHuda ne husn diya hai tumhein shabab ke sath

subu-o-jam khanakte hue rabab ke sath

labon se chhu ke pilao sharab wa'iz ko

purane log hain pite hain ye gulab ke sath

ye kis ki zulf-e-pareshan ka faiz hai yaro

tamam 'umr guzari hai pech-o-tab ke sath

khili hui jo hai suraj-mukhi gulistan mein

ye kis ne aankh milai hai aaftab ke sath

kahan wo garmi-e-'azm-o-'amal wo qurbani

wo josh KHatm hua daur-e-inqilab ke sath

KHudi ko faKHr hai hamdam ana ko hum par naz

ki hum ne 'umr guzari hai aab-o-tab ke sath

riwayaton ko kabhi chhoDte nahin 'gulzar'

shagufe rahte hain har waqt kuchh janab ke sath