KHuda ne KHush mujhe auqat se ziyaada kiya

ḳhudā ne ḳhush mujhe auqāt se ziyāda kiyā

ki haath tang rakhā aur dil kushāda kiyā

muhīt chāroñ taraf ek ism hai jis ne

nazar meñ rang bhare aa.ine ko saada kiyā

kabhī falak kabhī dhartī ne dī panāh mujhe

kabhī ḳhudā se kabhī ḳhud se istifāda kiyā

azal se us kā giraftār-e-‘ishq huuñ jis ne

diye ko raushnī meñ chāñd se ziyāda kiyā

bas ek sat.h-e-yaqīñ par rahe hamesha ham

na maiñ ne 'arz kabhī kī na us ne vā'da kiyā

tirā karam ki koī kaam aa paḌā us dam

maiñ jab kabhī tire inkār kā irāda kiyā

mire ḳhudā ne mirā rizq mujh ko pahuñchāyā

'jamāl' ghar se nikalne kā jab irāda kiyā

KHuda ne KHush mujhe auqat se ziyaada kiya

ki hath tang rakha aur dil kushada kiya

muhit chaaron taraf ek ism hai jis ne

nazar mein rang bhare aaine ko sada kiya

kabhi falak kabhi dharti ne di panah mujhe

kabhi KHuda se kabhi KHud se istifada kiya

azal se us ka giraftar-e-‘ishq hun jis ne

diye ko raushni mein chand se ziyaada kiya

bas ek sath-e-yaqin par rahe hamesha hum

na main ne 'arz kabhi ki na us ne wa'da kiya

tera karam ki koi kaam aa paDa us dam

main jab kabhi tere inkar ka irada kiya

mere KHuda ne mera rizq mujh ko pahunchaya

'jamal' ghar se nikalne ka jab irada kiya