KHuda ne to sabr aazmaya mera

ḳhudā ne to sabr āzmāyā mirā

magar tum ne kyoñ dil dukhāyā mirā

ġhamoñ ke the apne ḳhasāre magar

ḳhushī ne to ghar bech khāyā mirā

chalā to maiñ shāyad qadam do qadam

bharosa magar lauT aayā mirā

mirā haath hogā garebān par

koī kuchh agar kar na paayā mirā

chhupā kar huā mujh ko Dhāne kā kaam

so malba bhī andar girāyā mirā

kahāñ kab use kaam meñ le liyā

ye qātil nahīñ jaan paayā mirā

mirā jism bhī ye nahīñ jāntā

kahāñ ḳhatm hotā hai saaya mirā

KHuda ne to sabr aazmaya mera

magar tum ne kyon dil dukhaya mera

ghamon ke the apne KHasare magar

KHushi ne to ghar bech khaya mera

chala to main shayad qadam do qadam

bharosa magar lauT aaya mera

mera hath hoga gareban par

koi kuchh agar kar na paya mera

chhupa kar hua mujh ko Dhane ka kaam

so malba bhi andar giraya mera

kahan kab use kaam mein le liya

ye qatil nahin jaan paya mera

mera jism bhi ye nahin jaanta

kahan KHatm hota hai saya mera