KHuda-parast mile aur na but-parast mile

ḳhudā-parast mile aur na but-parast mile

mile jo log vo apne nashe meñ mast mile

kahīñ ḳhud apnī durustī kā dukh nahīñ dekhā

bahut jahāñ kī durustī ke bandobast mile

kahīñ to ḳhāk-nashīñ kuchh buland bhī hoñge

hazāroñ apnī bulandī meñ kitne past mile

ye sahl fat.h to phīkī sī lag rahī hai mujhe

kisī aziim muhim meñ kabhī shikast mile

ye shāḳh-e-gul kī lachak bhī payām rakhtī hai

basān-e-teġh the jo ham ko haq-parast mile

sunā hai chand tahī-dāmanoñ meñ zarf to thā

'surūr' ham ko tavañgar bhī tañg-dast mile

KHuda-parast mile aur na but-parast mile

mile jo log wo apne nashe mein mast mile

kahin KHud apni durusti ka dukh nahin dekha

bahut jahan ki durusti ke bandobast mile

kahin to KHak-nashin kuchh buland bhi honge

hazaron apni bulandi mein kitne past mile

ye sahl fath to phiki si lag rahi hai mujhe

kisi azim muhim mein kabhi shikast mile

ye shaKH-e-gul ki lachak bhi payam rakhti hai

basan-e-tegh the jo hum ko haq-parast mile

suna hai chand tahi-damanon mein zarf to tha

'surur' hum ko tawangar bhi tang-dast mile