KHuda se ishq ho achchhi dua salam na ho

ḳhudā se ishq ho achchhī duā salām na ho

ki jaise dasht ko bādal se koī kaam na ho

maiñ dostī meñ sharī.at kā paas rakhtā huuñ

agar ye zaḳhm lagānā mujhe harām na ho

khaTak rahā ho kisī shaḳhs kā dilāsā mujhe

aur us pe zulm ki paanī kā ehtimām na ho

maiñ āsmān kī dāvat qubūl kar lūñgā

magar zamīñ ke sivā koī tām-jhām na ho

duā to vo hai jo darkār ho hameñ ḳhud bhī

ḳhudā kare tū kisī kā kabhī ġhulām na ho

munāfiqat meñ koī maslahat nahīñ hotī

tū chāhtā hai ki talvār be-niyām na ho

mushā.ere meñ koī mujh sā sar-phirā bhī dikhā

ki jis ke paas cliche se bharā kalām na ho

KHuda se ishq ho achchhi dua salam na ho

ki jaise dasht ko baadal se koi kaam na ho

main dosti mein shariat ka pas rakhta hun

agar ye zaKHm lagana mujhe haram na ho

khaTak raha ho kisi shaKHs ka dilasa mujhe

aur us pe zulm ki pani ka ehtimam na ho

main aasman ki dawat qubul kar lunga

magar zamin ke siwa koi tam-jham na ho

dua to wo hai jo darkar ho hamein KHud bhi

KHuda kare tu kisi ka kabhi ghulam na ho

munafiqat mein koi maslahat nahin hoti

tu chahta hai ki talwar be-niyam na ho

mushaere mein koi mujh sa sar-phira bhi dikha

ki jis ke pas cliche se bhara kalam na ho